Wo Dukh Nasib Hue KHud-kafil Hone Mein
wo dukh nasib hue KHud-kafil hone mein
ki umr kaT gai KHud ki dalil hone mein
musafiron ke qadam Dagmagae jate the
ajab nasha tha safar ke tawil hone mein
wo ek sang jo raste mein istada tha
use zamane lage sang-e-mil hone mein
munafiqin se KHatra kabhi ghanim ka KHauf
qayamaten hain bahut be-fasil hone mein
aziz hone mein aasaniyan bahut si thin
bahut se dard mile hain 'nabil' hone mein
(839) Peoples Rate This