December Ki Aawaz

december chiKHta hai jab ragon mein

lutf se aari pareshan mahfilon mein

mujh ko wo badnam dushman yaad aata hai

jo mere KHun ka pyasa gali se jab guzarta tha

mere aasab mein ek sansani si dauD jati thi

main is lamhe ki barham aag mein jalta hua

mahsus karta tha

main zinda hun musalsal hun

main zinda hun musalsal hun

wo dushman mar gaya

ya doston aa aa mila

mein sochta hun puchhta hun

kaun batlaega

mere fikr aur ehsas ki be-samt rau

bahti hai roz-o-shab

december chiKHta hai ab

kahan manzil kahan manzil