Wo Ghazal Walon Ka Uslub Samajhte Honge
wo ghazal walon ka uslub samajhte honge
chand kahte hain kise KHub samajhte honge
itni milti hai meri ghazlon se surat teri
log tujh ko mera mahbub samajhte honge
main samajhta tha mohabbat ki zaban KHushbu hai
phul se log use KHub samajhte honge
dekh kar phul ke auraq pe shabnam kuchh log
tera ashkon bhara maktub samajhte honge
bhul kar apna zamana ye zamane wale
aaj ke pyar ko mayub samajhte honge
Bashir Badr 
(3092) Peoples Rate This