Wo Sitam-parwar Ba-chashm Ashk-bar Aa Hi Gaya

wo sitam-parwar ba-chashm ashk-bar aa hi gaya

chaak-damani pe meri us ko pyar aa hi gaya

miTte miTte miT gai jaan-e-wafa ki aarzu

aate aate be-qarari ko qarar aa hi gaya

chupke chupke mujh pe meri KHamushi hansti rahi

rote rote jazb-e-dil par iKHtiyar aa hi gaya

koi wada jis ka mani-ashna hota nahin

phir usi wada-shikan par e'tibar aa hi gaya

ya ilahi jazba-e-hosh-o-KHirad ki KHair ho

muntazir jis ka junun tha wo dayar aa hi gaya