Kisi Ke Naqsh-e-qadam Ka Nishan Nahin Milta

kisi ke naqsh-e-qadam ka nishan nahin milta

wo rahguzar hun jise karwan nahin milta

qadam qadam pe teri rah mein falak hail

mujhe talash se bhi aasman nahin milta

unhen tariqa-e-lutf-o-karam nahin malum

hamein saliqa-e-ah-o-fughan nahin milta

urus-e-dahr ko ghaza bhi chahiye lekin

ghubar-e-jada-e-amn-o-aman nahin milta

tujhe ye gham ki KHushi ko teri sabaat nahin

mujhe gila ki gham-e-jawedan nahin milta

dhaDak raha hai har ahl-e-wafa ke sine mein

hamara dard bhara dil kahan nahin milta

sabhi ko dawa-e-mahr-o-wafa hai duniya mein

jo mehrban na ho wo mehrban nahin milta

gham-e-hayat ke pur-haul qahqahon ke siwa

kahin se apna jawab-e-fughan nahin milta

dil-e-shikasta ko le jaiye kahan 'basit'

dimagh-e-naKHwat-e-shisha-garan nahin milta