Jab Chaudhwin Ka Chand Nikalta Dikhai De

jab chaudhwin ka chand nikalta dikhai de

wo gerua libas badalta dikhai de

dariya-e-zindagi ki nigahon ka hai qusur

Thahra dikhai de kabhi chalta dikhai de

paDne lage jo zor hawas ka to kya nigah

har zawiye se jism nikalta dikhai de

bahrupiye ke hath paDe hain so raat din

din raat rang-rup badalta dikhai de

rakkhe hai yun to panw sambhal-soch kar magar

nazron ka farsh hai ki phisalta dikhai de

us nam mein wo shola-gari hai jo lijiye

har room mein charagh sa chalta dikhai de

main 'ashk' shakl nam se waqif nahin magar

ek shaKHs hai jo sath hi chalta dikhai de