Faza-e-na-umidi Mein Umid-afza Payam Aaya

faza-e-na-umidi mein umid-afza payam aaya

main baiTha gin raha tha hasraten un ka salam aaya

hamari sham-e-furqat jaise ek sham-e-charaghan thi

jo aansu aaya palkon par ba-husn-e-ehtimam aaya

adhuri kis tarah rahti kahani ishq ki hamdam

idhar dam toDta tha main udhar un ka payam aaya

udhar bhi raushni phaili idhar bhi raushni phaili

wo jab mahfil mein aaya surat-e-mah-e-tamam aaya

chhiDi jab baat husn-o-ishq ki bazm-e-mohabbat mein

kahin par tera nam aaya kahin par mera nam aaya

jawani ke zamane ki bas itni si kahani hai

jab un ki yaad aai zabt ka jazba na kaam aaya

gada-e-mai-kada ban kar guzari zindagi jis ne

muqaddar mein usi ke rahmat-e-saqi ka jam aaya

bas itna yaad hai manzil-ba-manzil ham-safar the wo

na jaane kab sahar aai kahan hangam-e-sham aaya

mera aamal-nama ghumta tha meri nazron mein

jab apne samne ai 'charKH' waqt-e-iKHtitam aaya