Kahte Hain Jis Ko Hur Wo Insan Tumhin To Ho

kahte hain jis ko hur wo insan tumhin to ho

jati hai jis pe jaan meri jaan tumhin to ho

matlab ki kah rahe hain wo dana hamin to hain

matlab ki puchhte ho wo nadan tumhin to ho

aata hai baad-e-zulm tumhin ko to rahm bhi

apne kiye se dil mein pasheman tumhin to ho

pachhtaoge bahut mere dil ko ujaD kar

is ghar mein aur kaun hai mehman tumhin to ho

ek roz rang laengi ye mehrbaniyan

hum jaante the jaan ke KHwahan tumhin to ho

dildar o dil-fareb dil-azar o dil-sitan

lakhon mein hum kahenge ki han han tumhin to ho

karte ho 'dagh' dur se but-KHane ko salam

apni tarah ke ek musalman tumhin to ho