Buland Fikr Ki Har Sher Se Ayan Ho Ramaq

buland fikr ki har sher se ayan ho ramaq

mere qalam se ada ho kabhi ghazal ka haq

udas udas hain insan har ek chehra faq

ye shahr shahr hai ya dasht hai ye laq-o-daq

main dil ki baat kahun yun ki dil talak pahunche

na hon kinae hi mubham na istiare adaq

chalo sameT ke office ko apne ghar ki taraf

ufuq ke par wo dekho utar rahi hai shafaq

zara sa ilm-o-hunar pa gae to kuchh kam-zarf

samajh rahe hain sabhi ko hi ahqar-o-ahmaq

phir ehtijaj ke raste pe kyun chalenge hum

hamein jo milta rahe aap se hamara haq

talluqat mein qaem rakhen bharose ko

ki shak hamesha hi karta raha hai rishte shaq

kisi kitab mein milta nahin hai zikr 'azam'

hamein sikhae hain is zindagi ne aise sabaq