Rang Mausam Ke Sath Lae Hain

rang mausam ke sath lae hain

ye parinde kahan se aae hain

baiTh jate hain rah-rau thak kar

kitne himmat-shikan ye sae hain

dhup apni zamin hai apni

peD apne nahin parae hain

apne ahbab ki KHushi ke liye

bila-irada bhi muskurae hain

dushmanon ko qarib se dekha

doston ke fareb khae hain

hum ne toDa hai zulmaton ka fusun

raushni ke bhi tir khae hain

dekh le muD kar mahw-e-araish

aaina ban ke hum bhi aae hain

pai-ba-pai rah ki shikaston ne

hausle aur bhi baDhae hain

zindagi hai usi ka nam 'ejaz'

hain wo apne jo gham parae hain