Tin Aawazen

zalim

jashn hai matam-e-ummid ka aao logo

marg-e-amboh ka tyauhaar manao logo

adam-abaad ko aabaad kiya hai main ne

tum ko din raat se aazad kiya hai main ne

jalwa-e-subh se kya mangte ho

bistar-e-KHwab se kya chahte ho

sari aankhon ko tah-e-tegh kiya hai main ne

sare KHwabon ka gala ghunT diya hai main ne

ab na lahkegi kisi shaKH pe phulon ki hina

fasl-e-gul aaegi namrud ke angar liye

ab na barsat mein barsegi guhar ki barkha

abr aaega KHas-o-KHar ke ambar liye

mera maslak bhi naya rah-e-tariqat bhi nai

mere qanun bhi nae meri shariat bhi nai

ab faqihan-e-haram dast-e-sanam chumenge

sarw-qad miTTi ke baunon ke qadam chumenge

farsh par aaj dar-e-sidq-o-safa band hua

arsh par aaj har ek bab-e-dua band hua

mazlum

raat chhai to har ek dard ke dhaare chhuTe

subh phuTi to har ek zaKHm ke Tanke TuTe

dopahar aai to har rag ne lahu barsaya

din Dhala KHauf ka ifrit muqabil aaya

ya KHuda ye meri gardan-e-shab-o-roz-o-sahar

ye meri umr ka be-manzil o aaram safar

kya yahi kuchh meri qismat mein likha hai tu ne

har masarrat se mujhe aaq kiya hai tu ne

wo ye kahte hain tu KHush-nud har ek zulm se hai

wo ye kahte hain har ek zulm tere hukm se hai

gar ye sach hai to tere adl se inkar karun?

un ki manun ki teri zat ka iqrar karun?

nida-e-ghaib

har ek ulil-amr ko sada do

ki apni fard-e-amal sambhaale

uThega jab jam-e-sarfaroshan

paDenge dar-o-rasan ke lale

koi na hoga ki jo bacha le

jaza saza sab yahin pe hogi

yahin azab o sawab hoga

yahin se uTThega shor-e-mahshar

yahin pe roz-e-hisab hoga

(2681) Peoples Rate This

Your Thoughts and Comments

Tin Aawazen In English By Famous Poet Faiz Ahmad Faiz. Tin Aawazen is written by Faiz Ahmad Faiz. Read famous Poem Tin Aawazen for youth and Student by Faiz Ahmad Faiz. Free Download Tin Aawazen in PDF.