Kucha-e-jaanan Mein Ja Nikle Jo Ghilman Bhul Kar

kucha-e-jaanan mein ja nikle jo ghilman bhul kar

yaad ho us ko na phir gulzar-e-rizwan bhul kar

sang-dil be-mehr be-din bewafa samjhe na hum

kar diye sadqe hasinon par dil o jaan bhul kar

bosa-e-abru ko le kar munh pe khai hum ne tegh

kuchh kiya tum ne na pas-e-tegh uryan bhul kar

kar ke tauba qaul hai ab hazrat-e-dil ka yahi

ab kabhi lenge na nam-e-ishq-e-KHuban bhul kar

KHun rulaya umr bhar 'shaukat' firaq-e-yar ne

marte marte bhi na nikla koi arman bhul kar