BichhDe Ghar Ka Saya

subh-sawere

wo bistar se sae jaisi uThti hai

phir chulhe mein raat ki ThanDi aag ko

raushan karti hai

itne mein din chaDh jata hai

jaldi jaldi chae bana kar shauhar ko ruKHsat karti hai

sayyare gardish karte hain

shahr mein sahra sahraon mein chaTyal maidan

kohsaron ke nasheb-o-faraaz bana karte hain

sare ghar ko dhoti hai

kapDe tauliye tooth-brush bistar ki chadar

koi kitab uThati hai rakh deti hai

radio on kiya phir roka on kiya

phir koi purana KHat paDhti hai

(ghanTi baji)

maryam! aa jao

tum kaisi ho? wo kaise hain

kya us ka koi KHat aaya?

(thoDi KHamoshi ka waqfa)

tum kaisi ho

tum se matlab? sach kah dun to kya kar logi

dekho sab ki sab baiThi hon

achchha

achchha

(darwaza phir band ho gaya)

ab kya karna!

ghar to bilkul saf paDa hai

koi shikan bistar pe nahin hai

diwar-o-dar dhule-dhulae

koi dhabba ya makDi ka jala tinka

kahin kuchh nahin

kya karna hai!

uf! wo calendar

kitne baras ho gae phir bhi

aaen to un se kahti hun

bilkul naya calendar laen

kuchh bhuk nahin

ab kya karna hai

leT rahun? lekin kya leTun

jaane kitna leT chuki hun

khaDi rahun

han khaDi rahun

par main to kab se khaDi hui hun

khiDki ka parda hi kholun

dhup kahan tak aa pahunchi hai

lao apna album dekhun

nayyar shabnam shafaq subuhi aKHtar juhi

kaise honge

aan! ye main hun

itti pyari pyari thi main

main bilkul hi bhul gai thi

sab kitna achchha lagta tha

abba, amman, bhayya, appi

sab zinda the

saya nani gulshan aapa

han aur wo gaurayya baba

aansu naghme shor Thahake sare ek sur mein hote the

sari duniya ghar lagti thi

aman udhar bulaya kartin

abba udhar pukara karte

bhayya DanTte

appi Dheron pyar jatatin

khana, pina, sona, jagna, hansna, ruThna, manna

Dor bandhi thi

ek mein ek piroya hua tha

kal nammu ke ghar shadi hai

pas hi koi maut hui hai

college ki chhaTi kab hogi

id phir ab ki tis ki hogi

hum bhi lail-e-qadr jagenge

shahla ki mangni kyun TuTi?

kya iqbaal koi shaer tha?

chup baDke abba sun lenge

sae dauD rahe hain ghar mein

har goshe mein upar niche andar bahar dauD rahe hain

lambe chhoTe sabz o zard hazaron sae

bahar shahr mein koi nahin hai

dhup siyah paDti jati hai

qadd-e-adam aaine mein

us ka nanga jism khaDa hai

jism ke andar suraj ka ghuncha mahka hai

sayyare gardish karte hain

sab anjaane sayyaron mein bhule-bisre ghar raushan hain

kis lamhe ka hai ye tamasha

hast-o-bud ke sannaTe mein

la-maujud ki tariki mein

sirf yahi aaina raushan

sirf ek aks-e-guzishta raushan

bichhDe ghar ka saya raushan