KHwab Mein Dekh Raha Hun Ki Haqiqat Mein Use
KHwab mein dekh raha hun ki haqiqat mein use
main kabhi dekh nahin sakta musibat mein use
wo mera yar-e-tarah-dar ki KHush-fahm bhi hai
koi dhoka hi na de jae mohabbat mein use
zindagi ho to kai kaam nikal aate hain
yaad aaunga kabhi main bhi zarurat mein use
ek talluq tha ki shishe ki tarah TuT gaya
joD sakta hi nahin main kisi surat mein use
aaj tak jism mera TuT raha hai 'fazil'
main ne dekha tha kabhi nind ki haalat mein use
Fazil Jamili 
(1191) Peoples Rate This