Jate Hain Wahan Se Gar Kahin Hum

jate hain wahan se gar kahin hum

hir-phir ke phir aate hain wahin hum

sad-haif ki kunj-e-be-kasi mein

koi nahin aur hain hamin hum

KHamoshi ki mohr hai dahan par

hain halqa-e-gham mein jun nagin hum

aaya na wo shoKH aur gae aah

hasrat hi bhare tah-e-zamin hum

takte rahe jaanib-e-dar ai wae

mar mar ke ba-waqt-e-wapsin hum

kya kya khinche hain aap ko dur

Tuk baiThe jo yar ke qarin hum

dekh aaina hum se puchhe the yun

sach kahiyo ki kaise hain hasin hum

qismat mein to hijr hai 'ghazanfar'

ab wo hai to aap mein nahin hum