Hayat-e-rawan

ba-zahir kahin koi halchal nahin hai

hayat-e-rawan apne markaz se chimTi hui hai

bahut aam be-kar uljhe dinon ki

mulaem si gaThri mein rakkhi hui

ek be-nam si dopahar hai

hawa chal rahi hai

na jaane kahan

gahre bechain baadal ke TukDe

uDe ja rahe hain

pareshan saDkon pe bahte hue zard patte

faza mein bikharta hua kuchh ghubar-e-musalsal

zara pal do pal ko

bahut dur patton pe hansta hua

tez suraj

magar phir chamakti hui ek kiran par

jhapaTte hue gadle baadal

khule aasman par Thaharte nahin hain

hawa chalti rahti hai rukti nahin hai

daraKHton pe shaKHen

idhar se udhar Dolti hain

idhar se udhar

meri chashm-e-tasawwur mein uDte hue chand TukDe

lapakte jhapakte KHayalat ke maile baadal

kahin sath-e-dil par Thaharte nahin hain

ba-zahir jahan koi halchal nahin hai

magar ye ghubar-e-musalsal uDae chali ja rahi hai

hawa chalti rahti hai rukti nahin hai

hayat-e-rawan apne markaz se chimTi hui hai

magar be-nam si dopahar ke

sukut-e-nihan mein

ajab be-kali hai

(785) Peoples Rate This

Your Thoughts and Comments

Hayat-e-rawan In English By Famous Poet Gulnaz Kausar. Hayat-e-rawan is written by Gulnaz Kausar. Read famous Poem Hayat-e-rawan for youth and Student by Gulnaz Kausar. Free Download Hayat-e-rawan in PDF.