Yun To Hasin Akasr Hote Hain Shan Wale
yun to hasin akasr hote hain shan wale
lekin kuchh aur hai tu o aan-ban wale
naqus-e-dair phunkun kabe mein ya azan dun
tujh ko kahan pukarun o la-makan wale
mimbar pe baiTh kar tu itna bahak na waiz
kaisi ye nichi baaten unchi dukan wale
ye husn ye jawani mehman hai chand roza
is par na kar ye ghurra o aan-ban wale
kabe ko shaiKH jae but-KHane ko barahman
yunhi DaTe rahenge us aastan wale
abru pe Dal kar bal tirchhi nazar na kar tu
ye tir kaj paDega banki kaman wale
ghairon pe to nazar hai meri bhi kuchh KHabar hai
main bhi miTa hua hun o aan-ban wale
talwar khinch kar kya bazu ko dekhta hai
do hath bas laga de ab imtihan wale
qael tera jahan hai han farq darmiyan hai
kuchh hain yaqin wale kuchh hain guman wale
farhad qais donon de baiThe jaan aaKHir
marte hain baat hi par jitne hain aan wale
wo kis liye bulaen jaen 'hafiz' hum kyun
wo bhi hain shan wale hum bhi hain aan wale
Hafeez Jaunpuri 
(972) Peoples Rate This
Fatal error: Uncaught PDOException: SQLSTATE[42S22]: Column not found: 1054 Unknown column 'id' in 'ORDER BY' in /home/darsaal/htdocs/darsaal.com/poetry/poem_en.php:544 Stack trace: #0 /home/darsaal/htdocs/darsaal.com/poetry/poem_en.php(544): PDOStatement->execute() #1 {main} thrown in /home/darsaal/htdocs/darsaal.com/poetry/poem_en.php on line 544