Husn Kis Roz Humse Saf Hua

husn kis roz hum se saf hua

gunah-e-ishq kab muaf hua

le liya shukr kar ke saqi se

dard is mein hua ki saf hua

tegh-e-qatil par apna KHun jam kar

maKHmal-e-surKH ka ghilaf hua

zahr parhez ho gaya mujh ko

dard darman se almuzaf hua

KHaksari ki ho chuki mearaj

sina apna zamin-e-saf hua

kamar-e-yar ne dikhai aankh

mardum-dida KHal-e-naf hua

wada jhuTa nakarda mard nahin

qaul se feal jab KHilaf hua

fatiha ko jo wo pari aai

sang-e-qabr apna koh-qaf hua

us kamar ke subut mein aajiz

fikr kar kar ke mushigaf hua

rind-mashrab hun mujh ko kya howe

mazhabon mein jo iKHtilaf hua

wo dahan hun na nikla harf-e-ghurur

wo zaban hun na jis se laf hua

gird is kucha ke phira 'atish'

haji se kaba ka tawaf hua