Kya Hota Hai KHizan Bahaar Ke Aane Jaane Se

kya hota hai KHizan bahaar ke aane jaane se

sab mausam hain dil khilne aur dil murjhane se

ek diya kab rok saka hai raat ko aane se

lekin dil kuchh sambhla to ek diya jalane se

jo phulon aur kanTon ki pahchan nahin rakhta

phul nahin rukte ghar us ka bhi mahkane se

jalte nazar nahin aae aur jal kar KHak hue

dur ka rishta apna bhi nikla parwane se

kachchi umr mein aur sawan mein kaise baz aaen

aankhen jagmag karne se aanchal lahrane se

kitna achchha lagta hai ek aam sa chehra bhi

sirf mohabbat-bhara tabassum lab par lane se

gae dinon mein rona bhi to kitna sachcha tha

dil halka ho jata tha jab ashk bahane se

bhigi raat ka sannaTa karta hai wahi baaten

zaKHm hare hote hain jo baaten yaad aane se

(764) Peoples Rate This

Your Thoughts and Comments

Kya Hota Hai KHizan Bahaar Ke Aane Jaane Se In English By Famous Poet Hasan Akbar Kamal. Kya Hota Hai KHizan Bahaar Ke Aane Jaane Se is written by Hasan Akbar Kamal. Read famous Poem Kya Hota Hai KHizan Bahaar Ke Aane Jaane Se for youth and Student by Hasan Akbar Kamal. Free Download Kya Hota Hai KHizan Bahaar Ke Aane Jaane Se in PDF.