Qalb-o-jaan Mein Husn Ki Gahraiyan Rah Jaengi
qalb-o-jaan mein husn ki gahraiyan rah jaengi
tu wo suraj hai teri parchhaiyan rah jaengi
ahl-e-dil ko yaad sadiyon aaega mera junun
shohraten hongi fana ruswaiyan rah jaengi
guftugu tujh se karengi meri ghazlen subh-o-sham
teri KHalwat mein meri tanhaiyan rah jaengi
main nikal jaunga apni justuju mein ek din
bazm-e-yaran mein KHayal-araiyan rah jaengi
dur tak koi na hoga naghma-sanjon mein 'naim'
bas chaman mein yaad ki purwaiyan rah jaengi
Hasan Nayeem 
(1008) Peoples Rate This