Dil Ko Gham Ras Hai Yun Gul Ko Saba Ho Jaise
dil ko gham ras hai yun gul ko saba ho jaise
ab to ye dard ki surat hi dawa ho jaise
har-nafs halqa-e-zanjir nazar aata hai
zindagi jurm-e-tamanna ki saza ho jaise
kan bajte hain sukut-e-shab-e-tanhai mein
wo KHamoshi hai ki ek hashr bapa ho jaise
ab to diwanon se yun bach ke guzar jati hai
bu-e-gul bhi tere daman ki hawa ho jaise
kahte kahte gham-e-dil umr guzari lekin
phir bhi ehsas ye hai kuchh na kaha ho jaise
'hosh' be-tabi-e-ehsas ka aalam tauba
mujh mein chhup kar wo mujhe dekh raha ho jaise
Hosh Tirmizi 
(809) Peoples Rate This