Thikana Hai Kahin Jaen Kahan Na-chaar BaiThe Hain
Thikana hai kahin jaen kahan na-chaar baiThe hain
ijazat jab nahin dar ki pas-e-diwar baiThe hain
ye matlab hai ki mahfil mein manae aur man jaen
wo mere chheDne ko ghair se bezar baiThe hain
KHaridar aa rahe hain har taraf se naqd-e-jaan le kar
wo yusuf ban ke bikne ko sar-e-bazar baiThe hain
achanak le na lun bosa ye khaTka un ke dil mein hai
mere pahlu mein baiThe hain magar hoshyar baiThe hain
tumhaare aashiqon mein be-qarari kya hi phaili hai
jidhar dekho jigar thame hue do-chaar baiThe hain
qayamat hai sitam murde pe bhi un ko gawara hai
mera lasha uThane ke liye aghyar baiThe hain
lab-e-baam aa ke dikhla wo tamasha tur ka tum bhi
baDe mauqe se dar par talib-e-didar baiThe hain
'asar' kyun-kar na jaanun us ke dar ko qibla-e-alam
usi jaanib kai ruKH kafir o din-dar baiThe hain
Imdad Imam Asar 
(919) Peoples Rate This
Fatal error: Uncaught PDOException: SQLSTATE[42S22]: Column not found: 1054 Unknown column 'id' in 'ORDER BY' in /home/darsaal/htdocs/darsaal.com/poetry/poem_en.php:544 Stack trace: #0 /home/darsaal/htdocs/darsaal.com/poetry/poem_en.php(544): PDOStatement->execute() #1 {main} thrown in /home/darsaal/htdocs/darsaal.com/poetry/poem_en.php on line 544