Aaj Phir Chand Usne Manga Hai
aaj phir chand us ne manga hai
chand ka dagh phir chhupana hai
chand ka husn to hai la-sani
phir bhi kitna falak pe tanha hai
kash kuchh aur mangta mujh se
chand KHud gardishon ka mara hai
dur hai chand is zamin se bahut
phir bhi har shab tawaf karta hai
bastiyon se nikal ke sahra mein
justuju kis ki roz karta hai
kis KHata ki saza mili us ko
kis liye roz ghaTta baDhta hai
chand se ye zamin nahin tanha
ai falak tu bhi jagmagaya hai
aaj taron ki bazm chamki hai
chand par baadalon ka saya hai
raushni phuT nikli misron se
chand ko jab ghazal mein socha hai
(839) Peoples Rate This