آج پھر چاند اس نے مانگا ہے

آج پھر چاند اس نے مانگا ہے

چاند کا داغ پھر چھپانا ہے

چاند کا حسن تو ہے لا ثانی

پھر بھی کتنا فلک پہ تنہا ہے

کاش کچھ اور مانگتا مجھ سے

چاند خود گردشوں کا مارا ہے

دور ہے چاند اس زمیں سے بہت

پھر بھی ہر شب طواف کرتا ہے

بستیوں سے نکل کے صحرا میں

جستجو کس کی روز کرتا ہے

کس خطا کی سزا ملی اس کو

کس لیے روز گھٹتا بڑھتا ہے

چاند سے یہ زمیں نہیں تنہا

اے فلک تو بھی جگمگایا ہے

آج تاروں کی بزم چمکی ہے

چاند پر بادلوں کا سایا ہے

روشنی پھوٹ نکلی مصرعوں سے

چاند کو جب غزل میں سوچا ہے