ابھی سے کیسے کہوں تم کو بے وفا صاحب

ابھی سے کیسے کہوں تم کو بے وفا صاحب

ابھی تو اپنے سفر کی ہے ابتدا صاحب

نہ جانے کتنے لقب دے رہا ہے دل تم کو

حضور جان وفا اور ہم نوا صاحب

تمہاری یاد میں تارے شمار کرتی ہوں

نہ جانے ختم کہاں ہو یہ سلسلہ صاحب

کتاب زیست کا عنوان بن گئے ہو تم

ہمارے پیار کی دیکھو یہ انتہا صاحب

تمہارا چہرہ مرے عکس سے ابھرتا ہے

نہ جانے کون بدلتا ہے آئینہ صاحب

رہ وفا میں ذرا احتیاط لازم ہے

ہر ایک گام پہ ہوتا ہے حادثہ صاحب

سیاہ رات ہے مہتاب بن کے آ جاؤ

یہ اندراؔ کے لبوں پر ہے التجا صاحب