Mil Mujhse Ai Pari Tujhe Quran Ki Qasam

mil mujh se ai pari tujhe quran ki qasam

deta hun tujh ko taKHt-e-sulaiman ki qasam

karr-o-bayon ki tujh ko qasam aur arsh ki

jibril ki qasam tujhe rizwan ki qasam

tuba ki salsabil ki kausar ke jam ki

hur-o-qusur-o-jannat-o-ghilman ki qasam

ruhul-qudus ki tujh ko qasam aur masih ki

mariyam ke tujh ko iffat-e-daman ki qasam

tauret ki qasam qasam injil ki tujhe

tujh ko qasam zabur ki furqan ki qasam

tujh ko mohammad-e-arabi ki qasam hai aur

maula-ali ki shah-e-KHurasan ki qasam

millat mein jis ki tu hui us ki qasam tujhe

aur apne din mazhab-o-iman ki qasam

daman ko meri hath se us raat mat jhaTak

tujh ko sahar ke chaak-e-gareban ki qasam

muddat se teri chah-e-zaqan mein ghariq hun

billah mujh ko yusuf-e-kanan ki qasam

qaidi hun main tera ba-KHuda-wandi-e-KHuda

aur us aziz-e-misr ke zindan ki qasam

musa ki hai qasam tujhe aur koh-e-tur ki

nur-o-farogh-e-jalwa-e-laman ki qasam

nargis ki aankh ki qasam aur gul ke kan ki

tujh ko sar-e-aziz-e-gulistan ki qasam

tujh ko qasam hai ghuncha-e-zambaq ke nak ki

aur shor-e-andalib-e-ghazal-KHwan ki qasam

sone ki gae ki qasam aur rud-e-nil ki

firaun ki qasam tujhe haman ki qasam

bistar mera hai KHar-e-mughilan basan-e-qais

laila ki hai tujhe saf-e-mizhgan ki qasam

aisi baDi qasam bhi na mane to hai tujhe

tujh ko usi ke shaukat-e-zishan ki qasam

dew-e-safed ki qasam aur koh-e-qaf ki

bagh-e-iram ki aur paristan ki qasam

lona-chamari ki qasam aur kallu-abir ki

kali-bala ki ghul-e-bayaban ki qasam

qasmen to sari ho chukin baqi rahi hai ab

pipal tale ke bhutne ki shaitan ki qasam

han phir tu kahiyo hae wo kis tarah hoe ghazab

'insha' na chheD mujh ko meri jaan ki qasam

(686) Peoples Rate This

Your Thoughts and Comments

Mil Mujhse Ai Pari Tujhe Quran Ki Qasam In English By Famous Poet Insha Allah Khan 'Insha'. Mil Mujhse Ai Pari Tujhe Quran Ki Qasam is written by Insha Allah Khan 'Insha'. Read famous Poem Mil Mujhse Ai Pari Tujhe Quran Ki Qasam for youth and Student by Insha Allah Khan 'Insha'. Free Download Mil Mujhse Ai Pari Tujhe Quran Ki Qasam in PDF.