Hum Bahut Dur Nikal Aae Hain Chalte Chalte

hum bahut dur nikal aae hain chalte chalte

ab Thahar jaen kahin sham ke Dhalte Dhalte

ab gham-e-zist se ghabra ke kahan jaenge

umr guzri hai isi aag mein jalte jalte

raat ke baad sahar hogi magar kis ke liye

hum hi shayad na rahen raat ke Dhalte Dhalte

raushni kam thi magar itna andhera to na tha

sham-e-ummid bhi gul ho gai jalte jalte

aap wade se mukar jaenge rafta rafta

zehn se baat utar jati hai Talte Talte

TuTi diwar ka saya bhi bahut hota hai

panw jal jaen agar dhup mein chalte chalte

din abhi baqi hai 'iqbaal' zara tez chalo

kuchh na sujhega tumhein sham ke Dhalte Dhalte