Koi Bijli In KHarabon Mein GhaTa Raushan Kare

koi bijli in KHarabon mein ghaTa raushan kare

ai andheri bastiyo tum ko KHuda raushan kare

nanhe honTon par khilen masum lafzon ke gulab

aur mathe par koi harf-e-dua raushan kare

zard chehron par bhi chamke surKH jazbon ki dhanak

sanwle hathon ko bhi rang-e-hina raushan kare

ek laDka shahr ki raunaq mein sab kuchh bhul jae

ek buDhiya roz chaukhaT par diya raushan kare

KHair agar tum se na jal paen wafaon ke charagh

tum bujhana mat jo koi dusra raushan kare

aag jalti chhoD aae ho to ab kya fikr hai

jaane kitne shahr ye pagal hawa raushan kare

dil hi fanus-e-hawa dil hi KHas-o-KHar-e-hawas

dekhna ye hai ki us ka qurb kya raushan kare

ya to is jangal mein nikle chand tere nam ka

ya mera hi lafz mera rasta raushan kare

(494) Peoples Rate This

Your Thoughts and Comments

Koi Bijli In KHarabon Mein GhaTa Raushan Kare In English By Famous Poet Irfan Siddiqi. Koi Bijli In KHarabon Mein GhaTa Raushan Kare is written by Irfan Siddiqi. Read famous Poem Koi Bijli In KHarabon Mein GhaTa Raushan Kare for youth and Student by Irfan Siddiqi. Free Download Koi Bijli In KHarabon Mein GhaTa Raushan Kare in PDF.