Kabhi Taqsir Jis Ne Ki Hi Nahin

kabhi taqsir jis ne ki hi nahin

hum se puchho to aadmi hi nahin

mar chuke jite-ji KHusha qismat

is se achchhi to zindagi hi nahin

dosti aur kisi gharaz ke liye

wo tijarat hai dosti hi nahin

ya wafa hi na thi zamane mein

ya magar doston ne ki hi nahin

kuchh meri baat kimiya to na thi

aisi bigDi ki phir bani hi nahin

jis KHushi ko na ho qayam-o-dawam

gham se bad-tar hai wo KHushi hi nahin

bandagi ka shuur hai jab tak

banda-parwar wo bandagi hi nahin

ek do ghunT jam-e-wahdat ke

jo na pi le wo muttaqi hi nahin

ki hai zahid ne aap duniya tark

ya muqaddar mein us ke thi hi nahin