Salamat Hai Sar To Sirhane Bahut Hain
salamat hai sar to sirhane bahut hain
mujhe dil-lagi ke Thikane bahut hain
jo tashrif lao to hai kaun mane
magar KHu-e-bad ko bahane bahut hain
asar kar gai nafs-e-rahzan ki dhamki
ki yan mard kam aur zanane bahut hain
muattal nahin baiThte shaghl wale
shikar-afganon ko nishane bahut hain
karo dil ke virane ki kunj-kawi
dabe is khanDar mein KHazane bahut hain
na ai shama ro ro ke mar sham hi se
abhi tujh ko aansu bahane bahut hain
hua meri rudad par hukm aaKHir
ki mashhur aise fasane bahut hain
nahin rail ya tar barqi pe mauquf
chhupe qudrati kar-KHane bahut hain
bache kyunki be-chaara murgh-e-gurasna
ba-kasrat hain dam aur dane bahut hain
bas ek aastana hai sajde ke qabil
zamana mein go aastane bahut hain
Ismail Merathi 
(862) Peoples Rate This
Fatal error: Uncaught PDOException: SQLSTATE[42S22]: Column not found: 1054 Unknown column 'id' in 'ORDER BY' in /home/darsaal/htdocs/darsaal.com/poetry/poem_en.php:544 Stack trace: #0 /home/darsaal/htdocs/darsaal.com/poetry/poem_en.php(544): PDOStatement->execute() #1 {main} thrown in /home/darsaal/htdocs/darsaal.com/poetry/poem_en.php on line 544