Kahne Ko Yun To Abr-e-karam Qatra-zan Hua
kahne ko yun to abr-e-karam qatra-zan hua
wo gul khile nadim ki KHun-e-chaman hua
ye dagh-e-dil ki jin se riwaj-e-sahar chala
nok-e-mizha pe ashk jo ubhra kiran hua
patthar ki muraten nazar aati hain chaar-su
yarab tere jahan ko ye kya dafatan hua
donon mein gunjti hain bahaaron ki dhaDkanen
meri ghazal hui ki tumhaara badan hua
donon se ho raha hai nai subh ka zuhur
teri qaba hui ki hamara kafan hua
'tahir' siyah-fam hue hum to gham nahin
raushan hamare nam se nam-e-suKHan hua
Jafar Tahir 
(630) Peoples Rate This