Sajda Aur Un Ke Aastane Ka

sajda aur un ke aastane ka

hausla dekhiye zamane ka

aazmaenge dhaar KHanjar ki

ye bahana hai KHun bahane ka

dil-e-sada ki sadgi dekho

e'tibar aur phir zamane ka

kis maze se qafas mein ahl-e-qafas

zikr sunte hain aashiyane ka

sath chalna hai jab zamane ke

shikwa kyun kijiye zamane ka

wo zamana abhi nahin aaya

KHwab dekha tha jis zamane ka

tum KHud ahl-e-nazar ho ai 'sarshaar'

rang dekha karo zamane ka