Sitam Kab Un Pe Dhaya Hai Kisi Ne

sitam kab un pe Dhaya hai kisi ne

bas aaina dikhaya hai kisi ne

falak se KHun ki barish kyun na hoti

zamin ka dil dikhaya hai kisi ne

meri aankhen chhalakne lag gain hain

talluq kya nibhaya hai kisi ne

siyasat khel hai jadugari ka

tamashai banaya hai kisi ne

bahut nazuk badan hai shairi ka

ki jaise gul uThaya hai kisi ne

baDi rahat mili 'jawed' dil ko

gale se jab lagaya hai kisi ne