Abhi Diwangi Mein Kuchh Kami Mahsus Hoti Hai

abhi diwangi mein kuchh kami mahsus hoti hai

abhi ai shiddat-e-gham zindagi mahsus hoti hai

abhi mujh mein koi shai aur bhi mahsus hoti hai

abhi idrak-e-wahdat mein kami mahsus hoti hai

na jaane zaKHm-e-dil ki aaj gahrai kahan pahunchi

phaTa jata hai sina wo KHushi mahsus hoti hai

samaya jata hai jaise koi rag rag mein dil ban kar

yunhi gham mein koi shai aur bhi mahsus hoti hai

shab-e-tarik hai virana hai mahwiyyat-e-gham hai

ajab aalam mein qurbat aap ki mahsus hoti hai

azal se maut ne ab tak kai qalib badalwae

magar jo choT thi dil mein wahi mahsus hoti hai

jahan wo baiTh jae gir ke manzil hai wahi us ki

jise har gam par wamandgi mahsus hoti hai

kisi ki yaad ko har dam bhulae rakhta hun phir bhi

khaTakti dil mein nok-e-KHar si mahsus hoti hai

bayaban ki kashish ab le uDegi dil ke zarron ko

ki har har sans par waraftagi mahsus hoti hai

jahan dil zabt-e-gham se KHun ho jata hai sina mein

wahin kuchh ruh ko baalidgi mahsus hoti hai

agar sine mein dil rakhte ho tum to aaj batla do

tumhein bhi meri betabi kabhi mahsus hoti hai

wafur-e-talKH-kaami se ye uqda khul gaya aaKHir

jo hoti hai to gham mein zindagi mahsus hoti hai

koi jine ko samjhe maya-e-ishrat bura kya hai

mujhe to ek ibaadat zindagi mahsus hoti hai

ghazal se ai 'jigar' andaza kar meri tabiat ka

ghazal mein kaifiyat kuchh ruh ki mahsus hoti hai

(581) Peoples Rate This

Your Thoughts and Comments

Abhi Diwangi Mein Kuchh Kami Mahsus Hoti Hai In English By Famous Poet Jigar Barelvi. Abhi Diwangi Mein Kuchh Kami Mahsus Hoti Hai is written by Jigar Barelvi. Read famous Poem Abhi Diwangi Mein Kuchh Kami Mahsus Hoti Hai for youth and Student by Jigar Barelvi. Free Download Abhi Diwangi Mein Kuchh Kami Mahsus Hoti Hai in PDF.