Ab Kya Karun

chha gai barsat ki pahli ghaTa ab kya karun

KHauf tha jis ka wo aa pahunchi bala ab kya karun

hijr ko bahla chali thi garm mausam ki sumum

na-gahan chalne lagi ThanDi hawa ab kya karun

aankh uThi hi thi ki abr-e-lala-gun ki chhanw mein

dard se kahne laga kuchh jhuTpuTa ab kya karun

ashk abhi thamne na pae the ki bedardi ke sath

bundiyon se bostan bajne laga ab kya karun

zaKHm ab bharne na pae the ki baadal charKH par

aa gaya angDaiyan leta hua ab kya karun

aa chuki thi nind si gham ko ki mausam na-gahan

bahr-o-bar mein karwaTen lene laga ab kya karun

charKH ki be-rangiyon se sust thi raftar-e-gham

yak-ba-yak har zarra gulshan ban gaya ab kya karun

qufl-e-bab-e-shauq thin mahaul ki KHamoshiyan

dafatan kafir papiha bol uTha ab kya karun

hijr ka sine mein kuchh kam ho chala tha pech-o-tab

baal bikhrane lagi kali ghaTa ab kya karun

aankh jhapkane lagi thi dil mein yaad-e-lahn-e-yaad

mor ki aane lagi ban se sada ab kya karun

ghaT chala tha gham ki rangin badliyon ki aaD se

un ka chehra samne aane laga ab kya karun

aa rahi hain abr se un ki sadaen 'josh' 'josh'

ai KHuda ab kya karun bar-e-KHuda ab kya karun

(1025) Peoples Rate This

Your Thoughts and Comments

Ab Kya Karun In English By Famous Poet Josh Malihabadi. Ab Kya Karun is written by Josh Malihabadi. Read famous Poem Ab Kya Karun for youth and Student by Josh Malihabadi. Free Download Ab Kya Karun in PDF.