Albeli Subh

nazar jhukae urus-e-fitrat jabin se zulfen haTa rahi hai

sahar ka tara hai zalzale mein ufuq ki lau tharthara rahi hai

rawish rawish naghma-e-tarab hai chaman chaman jashn-e-rang-o-bu hai

tuyur shaKHon pe hain ghazal-KHwan kali kali gunguna rahi hai

sitara-e-subh ki rasili jhapakti aankhon mein hain fasane

nigar-e-mahtab ki nashili nigah jadu jaga rahi hai

tuyur bazm-e-sahar ke mutrib lachakti shaKHon pe ga rahe hain

nasim firdaus ki saheli gulon ko jhula jhula rahi hai

kali pe bele ki kis ada se paDa hai shabnam ka ek moti

nahin ye hire ki kil pahne koi pari muskura rahi hai

sahar ko madd-e-nazar hain kitni riayten chashm-e-KHun-fishan ki

hawa bayaban se aane wali lahu mein surKHi baDha rahi hai

shaluka pahne hue gulabi har ek subuk pankhuDi chaman mein

rangi hui surKH oDhni ka hawa mein pallu sukha rahi hai

falak pe is tarah chhup rahe hain hilal ke gird-o-pesh tare

ki jaise koi nai naweli jabin se afshan chhuDa rahi hai

khaTak ye kyun dil mein ho chali phir chaTakti kaliyo? zara Thaharna

hawa-e-gulshan ki narm ro mein ye kisi ki aawaz aa rahi hai?

(626) Peoples Rate This

Your Thoughts and Comments

Albeli Subh In English By Famous Poet Josh Malihabadi. Albeli Subh is written by Josh Malihabadi. Read famous Poem Albeli Subh for youth and Student by Josh Malihabadi. Free Download Albeli Subh in PDF.