Shikast-e-zindan Ka KHwab

kya hind ka zindan kanp raha hai gunj rahi hain takbiren

uktae hain shayad kuchh qaidi aur toD rahe hain zanjiren

diwaron ke niche aa aa kar yun jama hue hain zindani

sinon mein talatum bijli ka aankhon mein jhalakti shamshiren

bhukon ki nazar mein bijli hai topon ke dahane ThanDe hain

taqdir ke lab ko jumbish hai dam toD rahi hain tadbiren

aankhon mein gada ki surKHi hai be-nur hai chehra sultan ka

taKHrib ne parcham khola hai sajde mein paDi hain tamiren

kya un ko KHabar thi zer-o-zabar rakhte the jo ruh-e-millat ko

ublenge zamin se mar-e-siyah barsengi falak se shamshiren

kya un ko KHabar thi sinon se jo KHun churaya karte the

ek roz isi be-rangi se jhalkengi hazaron taswiren

kya un ko KHabar thi honTon par jo qufl lagaya karte the

ek roz isi KHamoshi se Tapkengi dahakti taqriren

sambhlo ki wo zindan gunj uTha jhapTo ki wo qaidi chhuT gae

uTTho ki wo baiThin diwaren dauDo ki wo TuTi zanjiren