Kitabon Ne Go Istiaron Mein Hum Ko Batae Bahut Se Thikane Tumhaare

kitabon ne go istiaron mein hum ko batae bahut se Thikane tumhaare

magar kuchh wazahat se apna pata do samajhte nahin hum ye mubham ishaare

har ek phul gulshan mein ye kah raha hai har ek jam-e-mai se ye hum sun rahe hain

zamane ki nazron mein ghar hai usi ka jo hans hans ke din zindagi ke guzare

na ahl-e-haram ne madad ki hamari na ahl-e-kalisa ne gham-KHwariyan kin

agar tu bhi tarz-e-taghaful na chhoDe kahan jaen phir hum musibat ke mare

qadamat-pasandon pe kyun hans rahe ho KHuda ki qadamat-pasandi to dekho

hazaron nahin balki lakhon baras se wahi kahkashan hai wahi chand tare

mere ashk-e-KHunin ki gul-kariyon se zamane ko rangin qabaen mili hain

junun-e-mohabbat ka ye faiz samjhun bayaban mein bhi hain chaman ke nazare

na gham mujh ko girdab-e-ranj-o-bala ka na muhtaj hun main kisi naKHuda ka

safine ko maujon ki zad se bacha kar chala ja raha hun kinare kinare

teri KHashmagin aankh ki gardishon ne zamane ko zer-o-zabar kar diya hai

sahaaron pe koi bharosa kare kya sahaare to KHud DhunDte hain sahaare

usi ru-e-raushan ko hum chahte hain umidon ko tarik jis ne kiya hai

usi mah-e-taban ko hum DhunDte hain dikhae hain din ko hamein jis ne tare

tere shauq mein jo chala ja raha hai jo raste ki mushkil se ghabra raha hai

kabhi apni manzil pe ja hi rahega magar shart ye hai ki himmat na haare

suna hai ki shaer ho ai 'josh' tum bhi nazar bagh-e-jannat pe kyun hai tumhaari

musaddas mein haali to ye kah gae hain jahannam ko bhar denge shaer hamare

(574) Peoples Rate This

Your Thoughts and Comments

Kitabon Ne Go Istiaron Mein Hum Ko Batae Bahut Se Thikane Tumhaare In English By Famous Poet Josh Malsiani. Kitabon Ne Go Istiaron Mein Hum Ko Batae Bahut Se Thikane Tumhaare is written by Josh Malsiani. Read famous Poem Kitabon Ne Go Istiaron Mein Hum Ko Batae Bahut Se Thikane Tumhaare for youth and Student by Josh Malsiani. Free Download Kitabon Ne Go Istiaron Mein Hum Ko Batae Bahut Se Thikane Tumhaare in PDF.