DhaDakta Jata Hai Dil Muskurane Walon Ka
dhaDakta jata hai dil muskurane walon ka
uTha nahin hai abhi e'tibar nalon ka
ye muKHtasar si hai rudad-e-subh-e-mai-KHana
zamin pe Dher tha TuTe hue piyalon ka
ye KHauf hai ki saba laDkhaDa ke gir na paDe
payam le ke chali hai shikasta-haalon ka
na aaen ahl-e-KHirad wadi-e-junun ki taraf
yahan guzar nahin daman bachane walon ka
lipaT lipaT ke gale mil rahe the KHanjar se
baDe ghazab ka kaleja tha marne walon ka
Kaleem Aajiz 
(819) Peoples Rate This