Mujhe Aziz Hai Ye Nikhaton Ka Gahwara
mujhe aziz hai ye nikhaton ka gahwara
KHuda kare na mile tere gham se chhuTkara
kali kali teri doshizgi ki KHushbu hai
chaman chaman teri ranaiyon ka nazzara
qadam qadam tere aab-e-hayat ke chashme
rawish rawish teri ju-e-KHiram ka dhaara
nafas nafas tere kuche mein ek aalam hai
yahan se lauT ke jaane ka ab kise yara
gali gali meri ruswaiyon ke charche hain
kahan kahan liye phirti hai bu-e-awara
(329) Peoples Rate This