Dil TuTne Ka Band Ye Ranj-o-malal Kar

dil TuTne ka band ye ranj-o-malal kar

ab phenkna ye kanch kahan hai KHayal kar

masruf DhunDne mein hai koi shikar ko

baiTha hai koi apna yahan jal Dal kar

jis aadmi ko zahr bhi pachta tha ai tabib

pine laga hai aaj wo pani ubaal kar

nasur ho gaya tha ye na-qabil-e-rafu

dil phenkna paDa hamein aaKHir nikal kar

iman ko bhi apne jahan se bachaiye

locker mein mal-o-zar hi na rakhiye sambhaal kar

gar puchhna hi hai to zamane ka haal puchh

bare paDosiyon ke na hum se sawal kar

'jaanib' nasib wale to chahenge bas yahi

ho faisle jahan mein sikke uchhaal kar