Kyun Shahr UjaD Sa PaDa Tha

kyun shahr ujaD sa paDa tha

kya sar pe pahaD aa paDa tha

qudrat to gawah hai ki maidan

haare the ki haarna paDa tha

thi barf si raat aur lashkar

be-KHema o be-rida paDa tha

kya bhiD thi kal aur aaj dekha

sunsan wo rasta paDa tha

kyun KHemon ki aag bujh gai thi

ye rakh se puchhna paDa tha

wo sham-e-sukut bhi ajab thi

qatil ko pukarna paDa tha

tha mal dukan mein hasb-e-taKHsis

tah-KHana magar aTa paDa tha

is bab-e-rasad se rizq-e-taqdir

le aae jo kuchh gira paDa tha

apne hi mujassame ko toDa

hath apna ghalat bhi kya paDa tha