Ishq Ki Tisen Jo Mizrab-e-rag-e-jaan Ho Gain

ishq ki Tisen jo mizrab-e-rag-e-jaan ho gain

ruh ki madhosh bedari ka saman ho gain

pyar ki miThi nazar se tu ne jab dekha mujhe

talKHiyan sab zindagi ki lutf-e-saman ho gain

ab lab-e-rangin pe nurin muskurahaT kya kahun

bijliyan goya shafaq-zaron mein raqsan ho gain

majra-e-shauq ki be-bakiyan un par nisar

hae wo aankhen jo zabt-e-gham mein giryan ho gain

chha gain dushwariyon par meri sahl-angariyan

mushkilon ka ek KHayal aaya ki aasan ho gain