Hazar Ranj Ho Dil Lakh Dard-mand Rahe

hazar ranj ho dil lakh dard-mand rahe

KHayal past na ho hausla buland rahe

gham-e-firaq mein dil kyun na dard-mand rahe

bahaar aa ke gai hum qafas mein band rahe

KHuda ki yaad mein duniya ko bhul ja ai dil

wo kaam kar ki har ek tarf sud-mand rahe

mile ki kuchh na mile mangne se kaam rakhun

teri janab mein dast-e-dua buland rahe

dikhain gardish-e-dauran ne suraten kya kya

magar mujhe to akele tumhin pasand rahe

ghurur-e-husn unhen inkisar-e-shewa-e-ishq

wo be-niyaz rahe hum niyaz-mand rahe

janab-e-shaiKH bhi 'maKHmur' shab ko rindon mein

ajib haal se masruf-e-waz-o-pand rahe