Wo Kahte Hain Yaqin Lana PaDega

wo kahte hain yaqin lana paDega

ye dhoka jaan kar khana paDega

zamane ko badalna hum ne Thana

zamane ko badal jaana paDega

salamat hai hamara jazb-e-ulfat

tum aaoge tumhein aana paDega

yahi marzi hai us aaram-e-jaan ki

hamein ab jaan se jaana paDega

dil-e-nadan samajh jaega lekin

dil-e-nadan ko samjhana paDega

adu ke naz uThte kaun dekhe

teri mahfil mein uTh jaana paDega

nahin ai sang-e-dil han wo nahin tu

kiye par jis ko pachhtana paDega

baDa bad-rah hai charKH-e-sitamgar

use ab rah par lana paDega

paDa hai ai 'wafa' pala buton se

KHuda ko darmiyan lana paDega