Nahin Misal Koi Aisa Be-misal Badan

nahin misal koi aisa be-misal badan

hai KHud jawab wo apna hai KHud sawal badan

mahaz-e-jang-e-wafa pe shikast-e-ishq ke baad

paDa hai dasht mein ab tak wo paemal badan

tilism-e-kun-fayakun kis ne paDh ke phunk diya

zara si KHak hui kaisa ba-kamal badan

tere badan ki masafat ko tai kiya to magar

paDa hua hai abhi tak mera niDhaal badan

shuur-o-fikr pe ghaalib hai jism ka mausam

har ek KHwab badan hai har ek KHayal badan