Kahte Ho Na Denge Hum Dil Agar PaDa Paya

kahte ho na denge hum dil agar paDa paya

dil kahan ki gum kije hum ne muddaa paya

ishq se tabiat ne zist ka maza paya

dard ki dawa pai dard-e-be-dawa paya

dost-dar-e-dushman hai e'timad-e-dil malum

aah be-asar dekhi nala na-rasa paya

sadgi o purkari be-KHudi o hushyari

husn ko taghaful mein jurat-azma paya

ghuncha phir laga khilne aaj hum ne apna dil

KHun kiya hua dekha gum kiya hua paya

haal-e-dil nahin malum lekin is qadar yani

hum ne bar-ha DhunDa tum ne bar-ha paya

shor-e-pand-e-naseh ne zaKHm par namak chhiDka

aap se koi puchhe tum ne kya maza paya

hai kahan tamanna ka dusra qadam ya rab

hum ne dasht-e-imkan ko ek naqsh-e-pa paya

be-dimagh-e-KHajlat hun rashk-e-imtihan ta-kai

ek bekasi tujh ko aalam-ashna paya

KHak-bazi-e-ummid kar-KHana-e-tifli

yas ko do-alam se lab-ba-KHanda wa paya

kyun na wahshat-e-ghaalib baj-KHwah-e-taskin ho

kushta-e-taghaful ko KHasm-e-KHun-baha paya

fikr-e-nala mein goya halqa hun ze-sar-ta-pa

uzw uzw jun zanjir yak-dil-e-sada paya

shab nazara-parwar tha KHwab mein KHayal us ka

subh mauja-e-gul ko naqsh-e-boriya paya

jis qadar jigar KHun ho kucha dadan-e-gul hai

zaKHm-e-tegh-e-qatil ko turfa dil-kusha paya

hai makin ki pa-dari nam-e-sahib-e-KHana

hum se tere kuche ne naqsh-e-muddaa paya

ne 'asad' jafa-sail ne sitam junun-mail

tujh ko jis qadar DhunDa ulfat-azma paya