Na Hui Gar Mere Marne Se Tasalli Na Sahi

na hui gar mere marne se tasalli na sahi

imtihan aur bhi baqi ho to ye bhi na sahi

KHar KHar-e-alam-e-hasrat-e-didar to hai

shauq gul-chin-e-gulistan-e-tasalli na sahi

mai-parastan KHum-e-mai munh se lagae hi bane

ek din gar na hua bazm mein saqi na sahi

nafas-e-qais ki hai chashm-o-charagh-e-sahra

gar nahin sham-e-siyah-KHana-e-laili na sahi

ek hangame pe mauquf hai ghar ki raunaq

nauha-e-gham hi sahi naghma-e-shadi na sahi

na sataish ki tamanna na sile ki parwa

gar nahin hain mere ashaar mein mani na sahi

ishrat-e-sohbat-e-KHuban hi ghanimat samjho

na hui 'ghaalib' agar umr-e-tabii na sahi