Aap Kya Ek Sitamgar Bane BaiThe Hain
aap kya ek sitamgar bane baiThe hain
ghair bhi to mere gham-KHwar bane baiThe hain
waizon ki bhi ye tauqir hai allah allah
pasban-e-dar-e-KHummar bane baiThe hain
chashm hai aab-e-rawan sine mein daghon ki bahaar
hum bhi ek taKHta-e-gulzar bane baiThe hain
puchhte hain wo mujhi se ye ghazab to dekho
aap bhi talib-e-didar bane baiThe hain
dilrubai ke ye andaz ghazab hain tere
ki hawas-pesha KHaridar bane baiThe hain
Mirza Mayal Dehlvi 
(580) Peoples Rate This