Waiz Piye Hue Hun KHuda Ke Liye Na ChheD

waiz piye hue hun KHuda ke liye na chheD

dhaDka miTa hua hai azab o sawab ka

ya-rab unhen bahisht mein jaana na ho nasib

jo lutf uTha chuke hain shab-e-mahtab ka

kya kya bigaD rahe hain wo ban ban ke bazm mein

aashob-e-rozgar hai aalam itab ka

phir chahta hai dil ki wahi tak-jhank ho

phaD DhunDhta hun lutf sawal o jawab ka

zahid ko baada-KHwari ka chaska laga diya

ye kaam umr bhar mein hua hai sawab ka

shoKHi to ye hai bazm mein baiThe hain is tarah

goya khincha hua hai muraqqa hijab ka